Skip to main content

Labarin Karin Magana: Aiki da hankali ya fi aiki da agogo:



Aiki da hankali ya fi aiki da agogo: 

Akwai wani baƙo da ya taɓa ziyartar wani Sarki, sai kullum ya zo fada ya zauna in an tashi ya tashi ya tafi. Rannan sai Sarki ya ce da shi wai kai meye aikin ka? Sai baƙo ya ce shi aikinsa, shi ne aiki da hankali! 

Sarki ya ce ni ko ina so ka yi mani aiki da hankali. Baƙo ya ce shi ke nan. Aka kwashi watannan Sarki bai ga ya ce da shi komai ba, har Sarki ya gaji ya tambaye shi. Sai mai aiki da hankali ya ce, idan na yi ma aiki da hankalina za ka sa akashe ni ne! Sarki ya ce  aikin banza daga kawai ka yi abin da na saka sai in sa a kashe ka? Ina nan ina jirar ka ka yi aikin da hankalin naka. 

Sarki ya takura wa ma aiki da hankali sai mai aiki da hankali ya ce, to, a tara malamai. Sarki ya rantse da cewa duk abin da ya faɗi ba zai  yi masa komai ba. Sarki ya sa aka tara Malamai ya yi rantsuwa a kan cewa duk abin da mai aiki hankali ya faɗi bai da wata uƙuba. 

Sai mai aiki da hankali ya ce, ran nan muna zaune ka sa an je an sayo dawakai har guda ɗari, amma da aka kawo sai dai kawai ka faɗi yadda kake so a yi da su amma har aka raba ba ka je ka ga yadda suke ba bare kalarsu. 

Sannan rannan kana cikin gida sai ga shi za a wuce da sa za a je da shi kwata a yanka, da jin ihun yara ka fito ko da ka yi arba da saniyar sai ka ce wannan san girmar banza ne da shi amma ba zai yi nama ba, haka ko aka yi da aka yanka san bai yi wani nama ba. 

Sai kuma rannan aka ƙara zuwa da wani san za a wuce, shi ma nan da nan ka fita da gani san sai ka ce, duk da rashin girmarsa, san zai yi mai da nama, na bi, kuma tabbas abin da ka faɗi gaskiya ce. 

To, aiki da hankalin da na yi a nan, shi ne, duk yadda aka yi kai ba ɗan Sarki ba ne ko kuma kai ba ka gaji sarauta ba, don ba yadda za a yi wanda ke da nasaba da sarauta ya sa a kawo dawakai amma ya kasa zuwa ya ga yadda suke, sai dai ya faɗi yadda za a yi da su, amma da jin za a wuce da saniya ya yi zumut ya fita ya gani, ni a aiki da hankalina, ka fi nasaba da fawa ko sarkin fawa. 

Da jin wannan jawabi sai Sarkin ya harzaƙa amma ya yi damo ko da ya shiga gida ya sami mahaifiyarsa ya faɗa mata abin da ya faru ya kuma taƙura mata kan ta faɗa masa gaskiya, sai ta ce masa shi ɗan Sarkin Fawa garin ne, don ainihin Sarkin da yake ganin shi ne babansa baya haihuwa amma bai sani ba, shi ne idan baya nan sai ta riƙa zuwa wurin sarkin fawa.


Comments

Post a Comment

Popular posts from this blog

Ranar Hausa

Ranar Hausa Ta Duniya Inda Gizo Yake Saƙarsa: Hausa Ci Gaban Mai Ginan Tukwane Ko Ci Gaban Mai Haƙar Rijiya? 26/08/2023 Shin wannan ba son uwar dawa kawai ake yi wa harshen Hausa ba, har ma da romon baka. Akwai rubuce-rubuce da yawa da aka yi cikin harshen Hausa da suka haɗa da: Rubutattun waƙoƙin Hausa Waƙoƙin baka Rubutattun waƙoƙi na zamani Waƙoƙin baka na zamani Rubutaccen wasan kwaikwayo Wasan kwaikwayo na rediyo da na talabijin da na kuma bidiyo Wasan kwaikwai mai JERENGIYA (mai goyo ko mai dogon zango) Jaridu da mujallu na Hausa Gidajen rediyo da na talabijin da ake gudanar da su da Hausa Jami’o’i da kwalejin ilimi da na kwalejin kimiyya da fasaha da ake nazarin Hausa Sai dai wa ke karantar Hausa a mataki na JAMI’A ko KWALEJIN ILIMI ko KWALEJIN KIMIYYA DA FASAHA? Wa ke so ɗansa ya karanta Hausa a kowane irin mataki? Me ya sa a lokacin ɗaukar jarrabawar SAKANDERE yaranmu ba sa so su sanya Hausa a cikin jerin takardun da suke so su rubuta? Me ya sanya a swance ko ...
Post a Comment
https://youtube.com/user/mbfalama

Hausa Karin Magana

29/11/2019 Duk wanda ya ɗauki namiji uba, zai mutu maraya. Duk wadda ta ɗauki namiji uba, za ta mutu marainiya. Duk wanda ya ɗauki namiji uba, za ta mutu ba a mata gara ba. Namiji ba ɗan goyo ba.  Salon Tsari Na Karin Maganar  Duk waɗannan karin maganganu ne na Hausawa kuma sun hau kan tsari. Idan aka duba za a ga karin magana ce mai ɓarayi biyu: Sashen farko: Duk wadda ta ɗauki namiji uba, = gaɓoɓi 11 Sashe na biyu: Za ta mutu mareniya. = Gaɓoɓi 8 Duk wadda ta ɗauki namiji uba/ za ta mutu marainiya. 11/8 Wannan salo ne da zubi na karin maganar Hausa, wani lokaci za a ga sashen dama ya fi yawan gaɓoɓi, wani lokaci kuma hagu ya fi yawa, a wasu wuraren kuma su zama ɗaya, amma kuma za a ga ma’ana ta tafi yadda ake so ba tare da ta ɓaci ba. Yadda Ake Amfani Da Karin Maganar Mata su suka fi amfani da wannan karin maganar, kuma suna amfani da ita ne a lokacin da namiji ya yi masu ba daidai ba, sai su faɗi wannan karin maganar da nufin su nuna masa cewa, ai da ma suna san...
Post a Comment
https://youtube.com/user/mbfalama

JERIN SARKE A WAKOKIN BAKA NA HAUSA NA MUHAMMAD BELLO FALAMA 2015

Babi Na Ɗaya Gabatarwa 1.1      Shimfiɗa Waƙa, walau ta baka ko rubutacciya, wani muhimmin ɓangare ne na adabin al’umma. Masana sun yi nazarce-nazarce da dama kan jigo da salo, da kuma zubi da tsarin ire-iren waƙoƙin da ake da su na Hausa. Ta fuskar irin waɗannan nazarce-nazarce ne aka gano saƙonni da salo da kuma zubi da tsari da ma wasu abubuwa na daban da suka ƙunsu a cikin waƙoƙin baka na Hausawa. Wannan nazari ya ɗora ne a kan ire-iren nazarce-nazarcen da aka yi kan waƙoƙin baka na Hausawa, inda aka ɗauki jerin sarƙe aka nazarce shi. An ga yadda yadda maimai ke taka rawa wurin haifar da jerin sarƙe nau’o’insa. Jerin sarƙe, zance ne wanda aka sarƙa a falan biyu ko fiye, wato inda aka samu daidaito na sunaye ko yankuna ko kalmomi ko aka samu wani irin zubi mai burgewa, da aka samu ɓuraɓusai a cikinsa. An yi bayanin nau’o’in jerin sarƙe da suka haɗa da “Cikakken Jerin Sarƙe” da kuma “Ragagge Jerin Sarƙe”, tare da la’akari dadalilan da suke haif...
Post a Comment
https://youtube.com/user/mbfalama